Вынікі Дзіцячага збору: дапамогу атрымала 181 дзіця!

Мы падводзім вынікі Дзіцячага збору, прымеркаванага да пачатку навучальнага года. Дзякуючы вашым ахвяраванням дапамогу атрымалі 111 сем’яў у Беларусі і іншых краінах, у тым ліку шматдзетныя сем’і.

У межах Дзіцячага збору BYSOL выплачвае па €100 на кожнае дзіця. Гэтыя выплаты магчымыя дзякуючы неабыякавасці і шчодрасці тых, хто падтрымаў нашу ініцыятыву. Дапамога прызначаная дзецям палітвязняў — як тым, хто ўжо выйшаў на волю, так і тым, чые бацькі ўсё яшчэ знаходзяцца ў зняволенні.

Збор атрымалася правесці дзякуючы падтрымцы сяброў і партнёраў BYSOL. Грошы для яго мы збіралі падчас дабрачыннага аўкцыёну, а падчас прагляду фіналу чэмпіянату свету па футболе зладзілі дабрачынны розыгрыш прызоў. Разам гэтыя мерапрыемствы прынеслі €1177.

Асобна дзякуем арганізацыі беларусаў і беларусак у Даніі «Талака», якая падтрымала Дзіцячы збор значным унёскам.

Наступны Дзіцячы збор — Калядны. Хай цуды здараюцца!

Каманда BYSOL